Bashkimi Evropian ka miratuar paketën e 21-të të sanksioneve kundër Rusisë, duke zgjeruar masat ndaj dhjetëra kompanive dhe individëve të lidhur me industrinë ushtarake që mbështet luftën në Ukrainë. Shefja e politikës së jashtme të BE-së, Kaja Kallas, bëri të ditur se mbi 50 subjekte të kompleksit ushtarako-industrial rus, si dhe aktorë kyç të përfshirë në prodhimin e dronëve me rreze të gjatë veprimi, janë futur në listën e sanksioneve.
Paketa e re synon gjithashtu furnizues në vende të treta, përfshirë Kinën dhe Indinë, të cilët dyshohet se furnizojnë Rusinë me teknologji me përdorim të dyfishtë që përdoren në prodhimin e raketave, dronëve dhe mjeteve të tjera ushtarake.
Një nga masat kryesore të paketës është goditja e rrjetit të prodhimit dhe furnizimit të dronëve rusë Garpiya, të përdorur në sulmet ndaj Ukrainës. BE-ja ka vendosur sanksione ndaj 37 individëve dhe kompanive që prodhojnë komponentë të rëndësishëm për këta dronë, përfshirë motorë, koka raketash, katapulta dhe pajisje të tjera.
Po ashtu, për herë të parë janë vendosur masa edhe ndaj projektit satelitor rus Rassvet, i zhvilluar nga kompania Bureau 1440, i cili konsiderohet alternativa e Moskës ndaj sistemit Starlink. Sipas BE-së, ky projekt ka rëndësi strategjike për komunikimet dhe kapacitetet ushtarake të Rusisë.
Megjithëse ekspertët e mirëpresin zgjerimin e sanksioneve, ata paralajmërojnë se Rusia disponon disa lloje dronësh me rreze të gjatë veprimi, ndaj ndikimi i këtyre masave mund të mos ndryshojë menjëherë balancën ushtarake. Megjithatë, Brukseli thekson se presioni ekonomik dhe teknologjik ndaj Moskës do të vazhdojë derisa Rusia të ndalë agresionin ndaj Ukrainës.
