Kryeministri izraelit Benjamin Netanyahu deklaroi se Izraeli është “i përgatitur të veprojë më gjerësisht”, ndërsa situata në Bregun Perëndimor të pushtuar vijon të përkeqësohet mes operacioneve ushtarake, sulmeve të kolonëve izraelitë dhe përplasjeve me palestinezët.
Në orët e para të mëngjesit, forcat izraelite zhvilluan një operacion në qytetin e Nablusit, ku arrestuan rreth 40 palestinezë, mes tyre një grua dhe disa ish-të burgosur. Bastisjet vijnë vetëm pak ditë pasi ushtria izraelite u dislokua në zona të ndryshme të territorit, pas një vale dhune ku humbën jetën katër palestinezë dhe dy izraelitë.
Sipas autoriteteve palestineze, kolonë izraelitë hynë me forcë në fshatin Tal, duke u përplasur me banorët vendas. Incidenti u përshkallëzua dhe përfundoi me viktima, duke rritur edhe më tej tensionet në rajon.
Për zhvillimet ka reaguar edhe Egjipti. Ministria e Jashtme egjiptiane shprehu “shqetësim të thellë” për përshkallëzimin e dhunës nga kolonët izraelitë në territoret palestineze, duke dënuar aktet e dhunës, zjarrvëniet ndaj banesave, pronave dhe vendeve të kultit, si dhe sulmet ndaj civilëve.
Në deklaratën zyrtare, Kajro i cilësoi këto veprime si pjesë të “politikave sistematike që nxisin tensionet dhe minojnë përpjekjet për paqe dhe stabilitet”, duke theksuar se ato përbëjnë shkelje të së drejtës ndërkombëtare.
Egjipti i bëri thirrje komunitetit ndërkombëtar të ndërmarrë masa konkrete për të ndalur sulmet e kolonëve dhe për të garantuar mbrojtjen e civilëve palestinezë, ndërsa situata në Bregun Perëndimor mbetet tejet e tensionuar dhe shqetësimet për një përshkallëzim të mëtejshëm të konfliktit vijojnë të rriten.
