Presidenti amerikan Donald Trump ka vendosur të lërë mënjanë planet për një ofensivë të re ushtarake kundër Iranit, pas 13 ditësh sulmesh të njëpasnjëshme. Lajmi është raportuar nga The New York Times dhe Axios, duke cituar zyrtarë të administratës amerikane dhe burime të njohura me vendimmarrjen.
Sipas The New York Times, vendimi u mor pas shqetësimeve se një përshkallëzim i mëtejshëm i konfliktit mund të pakësonte në mënyrë të rrezikshme rezervat e Pentagonit të raketave mbrojtëse Patriot dhe municioneve të tjera të mbrojtjes ajrore të dislokuara në Lindjen e Mesme.
Raportohet se vendimi u mor pas një takimi të zhvilluar të premten mes Trump, këshilltarëve të tij kryesorë dhe anëtarëve të kabinetit, ku u vlerësuan rreziqet e vazhdimit të operacioneve ushtarake.
Nga ana tjetër, Axios, duke cituar dy burime anonime, shkruan se mbetet ende e paqartë nëse urdhri i Trump për ndërprerjen e sulmeve është një masë e përkohshme apo sinjalizon një ndryshim më afatgjatë të strategjisë amerikane ndaj Iranit.
Sipas raportit, vendimi i presidentit amerikan pasqyron një përpjekje për t'i dhënë më shumë hapësirë diplomacisë, por edhe vlerësimin se niveli aktual i operacioneve ushtarake ka arritur kufirin e efektivitetit të tij pa një rikthim në një fushatë të gjerë luftarake.
Megjithatë, burimet bëjnë të ditur se ushtria amerikane po përgatit plane alternative në rast se situata përshkallëzohet sërish dhe bëhet i nevojshëm rifillimi i operacioneve ushtarake në shkallë të gjerë.
