Autoritetet italiane kanë arrestuar një 26-vjeçar me origjinë tuniziane, i dyshuar si autor i vrasjes së gazetarit Luigi “Luca” Esposito, trupi gjysmë i djegur i të cilit u gjet gjatë natës mes 18 dhe 19 korrikut në një zonë rurale në periferi të Ebolit, në provincën e Salernos.
Sipas policisë italiane, i dyshuari u lokalizua në një ndërtesë të braktisur, jo shumë larg vendit ku u zbulua trupi i pajetë i gazetarit. Identifikimi i tij u bë falë analizës së pamjeve të kamerave të sigurisë dhe krahasimit të tyre me të dhënat e telefonisë celulare të mbledhura gjatë hetimeve.
Nga ekspertiza mjeko-ligjore ka rezultuar se Esposito ishte dhunuar barbarisht dhe kishte pësuar plagë të rënda, ndërsa hetuesit dyshojnë se është goditur edhe me një send të fortë. Në fytyrën e viktimës janë konstatuar shenja të shumta dhune, ndërsa arma e krimit dhe telefoni celular i gazetarit nuk janë gjetur ende.
Sipas hetimeve paraprake, gazetari ishte ende gjallë, megjithëse në gjendje agonie, kur autori i vuri flakën trupit të tij. Analizat mjeko-ligjore kanë zbuluar praninë e tymit në rrugët e frymëmarrjes, duke konfirmuar se ai ishte gjallë në momentin e përfshirjes nga zjarri.
Shkaku i vdekjes është përcaktuar si asfiksi, ndërsa hetuesit dyshojnë se Esposito është mbytur para se trupi i tij të digjej.
Ndërkohë, Mary Esposito, mike e gazetarit të ndjerë, ka kërkuar zbardhjen e plotë të ngjarjes, duke u shprehur se Luigi Esposito nuk e meritonte një fund të tillë tragjik dhe se beson se drejtësia do të nxjerrë në dritë të vërtetën.
Hetimet vijojnë për të sqaruar motivin dhe rrethanat e plota të krimit, ndërsa autoritetet italiane po mbledhin prova të tjera për dokumentimin e ngjarjes.
