Skizofrenia është një çrregullim serioz i shëndetit mendor që ndikon në mënyrën se si një person mendon, ndjen dhe sillet. Specialistët theksojnë se, ndryshe nga një perceptim i përhapur gabimisht, kjo sëmundje nuk lidhet me personalitete të shumëfishta, por me vështirësinë për të dalluar realitetin nga fantazia.
Sipas psikiatrit Timothy B. Sullivan, diagnoza e skizofrenisë vazhdon të bazohet në praninë e simptomave pozitive, si halucinacionet dhe iluzionet, si edhe në simptomat negative, që përfshijnë vështirësi në funksionimin social dhe njohës.
Personat me skizofreni mund të kenë probleme në organizimin e mendimeve, planifikimin, të folurin dhe shprehjen e emocioneve. Megjithatë, ekspertët theksojnë se jo të gjithë pacientët i shfaqin të njëjtat simptoma ose me të njëjtën shkallë ashpërsie.
Ndër shenjat kryesore që nuk duhen neglizhuar janë:
Halucinacionet;
Iluzionet ose perceptimi i gabuar i realitetit;
Mendimet dhe të folurit e çorganizuar;
Vështirësitë njohëse;
Agjitacioni;
Mendimet dhe ndjenjat vetëvrasëse.
Njohja e hershme e këtyre simptomave dhe kërkimi i ndihmës profesionale mund të ndihmojnë në diagnostikimin dhe trajtimin në kohë të sëmundjes.
