Kreu i forcës policore në veri të Rripit të Gazës, të kontrolluar nga Hamasi, është vrarë në një sulm ajror izraelit, njoftoi Ministria e Brendshme e Gazës.
Sipas autoriteteve lokale, gjenerali i brigadës Abdel Nasser al-Maqadma, i njohur edhe si guvernatori i Rripit verior të Gazës, humbi jetën gjatë një sulmi në zonën Sheikh Radwan, në veri të qytetit të Gazës.
Po gjatë së shtunës, një tjetër sulm izraelit në kampin e refugjatëve Nuseirat vrau një punonjës të ekipeve të shpëtimit, ndërsa një polic palestinez i plagosur javën e kaluar ndërroi jetë si pasojë e plagëve. Dy persona të tjerë u vranë pasi një sulm ajror goditi një banesë në Khan Younis, në jug të Gazës.
Sipas raportimeve, numri i viktimave nga sulmet izraelite të së shtunës ka arritur në të paktën katër persona. Ushtria izraelite nuk ka komentuar ende mbi këto incidente.
Izraeli ka intensifikuar goditjet ndaj forcave policore të drejtuara nga Hamasi, duke pretenduar se shumë prej tyre janë pjesë e krahut të armatosur të organizatës dhe përbëjnë kërcënim për sigurinë izraelite. Nga ana tjetër, Hamasi akuzon Izraelin se synon të krijojë kaos dhe anarki në Rripin e Gazës, duke shkelur armëpushimin e ndërmjetësuar nga SHBA.
Ndërkohë, përpjekjet diplomatike të Egjiptit, Katarit, Turqisë dhe Shteteve të Bashkuara për t’i dhënë fund luftës në Gaza vijojnë, por deri më tani nuk është arritur ndonjë përparim i rëndësishëm në negociata.
