Përfundimi i pushimeve shoqërohet shpesh me një ndjenjë trishtimi dhe mungese motivimi, por specialistët theksojnë se kjo është një gjendje normale. Megjithatë, për disa persona, rikthimi në shtëpi dhe në rutinën e përditshme mund të jetë më i vështirë dhe të shoqërohet me atë që njihet si “sindroma pas pushimeve”.
Kjo gjendje nuk konsiderohet sëmundje, por një reagim i zakonshëm i organizmit ndaj rikthimit në ritmet e përditshme. Ajo mund të shfaqet me simptoma si dhimbje koke, pagjumësi, vështirësi në përqendrim dhe ndjenjë lodhjeje.
Ekspertët këshillojnë që rikthimi në punë të mos bëhet menjëherë me ritme intensive, por gradualisht. Gjithashtu, rekomandohet që disa nga zakonet e këndshme të pushimeve të ruhen edhe pas kthimit, si koha për relaks, ushqimi i shëndetshëm dhe aktivitetet në natyrë.
Ekspozimi në diell, edhe gjatë ditëve në qytet, ndihmon në ruajtjen e humorit pozitiv. Specialistët sugjerojnë gjithashtu që, në vend të nostalgjisë për pushimet e përfunduara, njerëzit të fokusohen te objektivat dhe planet e reja për muajt në vijim.
Një tjetër mënyrë për ta bërë më të lehtë rikthimin është planifikimi i një udhëtimi ose pushimi të shkurtër në të ardhmen, duke krijuar kështu një motivim të ri dhe diçka për të pritur me padurim.
