Një test i ri gjaku mund të ndryshojë mënyrën se si diagnostikohet endometrioza, një sëmundje që prek rreth 190 milionë gra në mbarë botën dhe që shpesh mbetet e padiagnostikuar për vite me radhë.
Sipas një studimi të ri, testi identifikon një model specifik hormonal të lidhur me endometriozën, duke arritur mbi 95% saktësi në dallimin e grave të prekura nga ato pa këtë sëmundje. Zbulimi konsiderohet një hap i rëndësishëm drejt diagnostikimit më të hershëm të një gjendjeje që aktualisht mund të marrë deri në 12 vite për t’u konfirmuar.
Endometrioza është një sëmundje kronike, ku ind i ngjashëm me atë të mitrës zhvillohet jashtë saj, duke shkaktuar dhimbje të forta, probleme me fertilitetin dhe ndikim të madh në cilësinë e jetës. Aktualisht, diagnostikimi mbështetet në ekzaminimet pelvike, ekografi, rezonancë magnetike ose laparoskopi.
Studimi analizoi mostrat e gjakut të 159 grave me endometriozë të konfirmuar dhe 57 grave pa këtë sëmundje. Studiuesit zbuluan se pacientet me endometriozë kishin një “gjurmë hormonale” karakteristike, veçanërisht nivele më të larta të hormonit 11-ketotestosterone.
“Këto gjetje shënojnë një përparim të rëndësishëm në kuptimin tonë për endometriozën,” deklaroi Douglas Gibson, bashkautor i studimit nga Universiteti i Edinburgh-ut, duke shtuar se zbulimi mund të hapë rrugën për diagnostikim më të hershëm dhe zhvillimin e trajtimeve të reja.
Edhe Organizata Botërore e Shëndetësisë ka theksuar se vonesat në diagnostikimin e endometriozës mbeten një problem i madh, veçanërisht në vendet me të ardhura të ulëta dhe të mesme.
Megjithëse testi nuk është ende pjesë e praktikës së zakonshme klinike, rezultatet kanë rritur shpresat se në të ardhmen endometrioza do të mund të diagnostikohet më shpejt, më thjeshtë dhe pa nevojën e ndërhyrjeve kirurgjikale.
