Kompania farmaceutike daneze Novo Nordisk, prodhuesja e ilaçeve të njohura Wegovy dhe Ozempic, ka ngritur padi në Shtetet e Bashkuara kundër rivales së saj Eli Lilly, duke e akuzuar për reklama mashtruese që, sipas saj, krijojnë përshtypjen e rreme se ilaçet e Eli Lilly janë më efektive për humbjen e peshës.
Padia u depozitua të martën dhe pretendon se Eli Lilly, prodhuesja e Mounjaro dhe Zepbound, ka krahasuar dozat më të larta të miratuara të ilaçeve të saj me doza më të ulëta të produkteve të Novo Nordisk, duke anashkaluar versionet më të reja me doza më të larta të këtyre të fundit.
Sipas Novo Nordisk, reklamat e Eli Lilly përdorin studime të vjetra dhe lënë jashtë kontekstin më të fundit klinik, duke krijuar në mënyrë të qëllimshme idenë se produktet e saj janë superiore. Kompania kërkon që gjykata të urdhërojë tërheqjen e reklamave dhe nisjen e një fushate korrigjuese informuese.
Nga ana tjetër, Eli Lilly i hodhi poshtë akuzat, duke deklaruar se reklamat e saj janë “të vërteta, transparente dhe të bazuara në provat më të forta shkencore”. Kompania shtoi se do ta mbrojë me vendosmëri çështjen në gjykatë.
Përplasja ligjore vjen në një kohë kur dy gjigantët farmaceutikë po konkurrojnë fort për dominimin e tregut global të ilaçeve për humbjen e peshës, i cili sipas analistëve mund të kalojë vlerën e 100 miliardë dollarëve deri në vitin 2030.
