Një 66-vjeçar është gjetur i pajetë brenda një automjeti që u përfshi nga flakët mëngjesin e kësaj të hëne në lagjen nr. 10 të Korçës.
Sipas Policisë, rreth orës 08:40, një automjet tip “Benz” është përfshirë nga flakët. Menjëherë në vendngjarje mbërritën shërbimet e Policisë dhe zjarrfikëses, të cilat konstatuan se në sediljen e parë të pasagjerit ndodhej pa shenja jete shtetasi I. Ç., rreth 66 vjeç.
Nga veprimet e para hetimore dyshohet se 66-vjeçari i ka vënë vetë flakën automjetit, duke i dhënë fund jetës. Sipas burimeve paraprake, ai jetonte i vetëm pas problemeve familjare, ndërsa bashkëshortja dhe dy fëmijët e çiftit ndodhen në Greqi.
Policia ka gjetur edhe një shënim të lënë nga viktima para aktit ekstrem, ku ai shkruante: “Po iki se nuk jam sjellë mirë me familjen”.
Paraprakisht dyshohet se ndjenja e fajit për marrëdhëniet e vështira brenda familjes mund ta ketë shtyrë 66-vjeçarin drejt këtij veprimi, ndërsa grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes.
