Administrata e presidentit amerikan Donald Trump është e shqetësuar për vendimin e kryeministrit britanik Andy Burnham për të emëruar Ed Miliband në postin e ministrit të Jashtëm, raporton The Telegraph.
Miliband, i cili konsiderohej si kandidat për postin e ministrit të Financave, u emërua të hënën në krye të diplomacisë britanike, në kuadër të ndryshimeve të gjera në kabinetin e ri të Burnham. Pas emërimit, ai deklaroi se do të punojë për forcimin e marrëdhënieve strategjike me Bashkimin Evropian, duke theksuar njëkohësisht edhe “aleancën e fortë, të qëndrueshme dhe thelbësore” me Shtetet e Bashkuara.
Megjithatë, sipas The Telegraph, ekipi i Donald Trump kishte paralajmëruar më herët se do ta kishte të vështirë të bashkëpunonte me Miliband. Një zyrtar i lartë i administratës amerikane i tha gazetës se ai mund të shndërrohet në “pikë fërkimi” në marrëdhëniet transatlantike, për shkak të mbështetjes së tij për politikat e energjisë së gjelbër, të cilat Trump i ka kritikuar vazhdimisht.
Raportohet se ky paralajmërim është dhënë gjatë bisedimeve jozyrtare mes administratës Trump dhe ekipit të Burnham, pasi ky i fundit u konsiderua favorit për të pasuar Sir Keir Starmer në postin e kryeministrit.
Qëndrimet e Miliband kanë qenë shpesh në kundërshtim me ato të Shtëpisë së Bardhë. Në muajin shkurt ai udhëhoqi kundërshtimin në Këshillin e Sigurisë Kombëtare ndaj përdorimit të bazave britanike nga bombarduesit amerikanë gjatë konfliktit SHBA-Izrael me Iranin. Vendimi për të mos lejuar përdorimin e bazës strategjike Diego Garcia u konsiderua si një nga arsyet që përkeqësoi marrëdhëniet mes Sir Keir Starmer dhe Donald Trump.
Miliband është kritikuar gjithashtu për qëndrimin e tij kundër zgjerimit të shpimeve për naftë dhe gaz në Detin e Veriut. Si ministër i Energjisë ai bllokoi licenca të reja për kërkimet e hidrokarbureve dhe më herët kishte akuzuar ish-kryeministrin Rishi Sunak se po zhvillonte një “luftë kulturore klimatike në stilin e Trump”.
Një tjetër burim tensioni mbeten deklaratat e tij të mëparshme për presidentin amerikan. Në vitin 2016, Miliband shkroi se “duhet bërë çdo përpjekje për t’i rezistuar Trumpizmit”, ndërsa më vonë e cilësoi Trump si një person me të cilin Britania nuk ndan vlera të përbashkëta. Në vitin 2017 ai deklaroi se presidenti amerikan kishte “ulur standardin e idiotësisë” dhe mori pjesë në protestat “Stop Trump” në Londër.
Steve Bannon, ish-strategu kryesor dhe një nga aleatët më të afërt të Donald Trump, tha për The Telegraph se administrata amerikane kishte ndërmarrë hapin e pazakontë për të paralajmëruar kryeministrin e ri britanik se emërimi i Miliband do të dëmtonte marrëdhënien e veçantë mes SHBA-së dhe Britanisë.
Sipas gazetës britanike, edhe brenda qeverisë së re ekzistojnë shqetësime se deklaratat e mëparshme të Miliband për Trump mund të shndërrohen në një barrë politike dhe mediatike për diplomacinë britanike.
Në deklaratën e tij të parë si ministër i Jashtëm, Miliband premtoi se do të mbrojë “interesat dhe vlerat e Britanisë, si demokracia, liria dhe shteti i së drejtës”, duke theksuar se synon të forcojë njëkohësisht partneritetin strategjik me Bashkimin Evropian dhe aleancën me Shtetet e Bashkuara.
