Sekretari amerikan i Shtetit, Marco Rubio, akuzoi Iranin se po përpiqet ta përdorë Ngushticën e Hormuzit si mjet presioni ndaj komunitetit ndërkombëtar, ndërsa u bëri thirrje vendeve aleate të kontribuojnë më shumë në mbrojtjen e një prej korridoreve më të rëndësishme të transportit detar në botë.
Në një deklaratë për mediat, Rubio tha se Shtetet e Bashkuara do të vazhdojnë të ndërmarrin të gjitha masat e nevojshme për garantimin e sigurisë së lundrimit, por theksoi se barra nuk duhet të mbetet vetëm mbi Uashingtonin. Sipas tij, partnerët ndërkombëtarë duhet të ofrojnë mbështetje shtesë, si në aspektin ushtarak ashtu edhe financiar.
Diplomati amerikan nënvizoi se SHBA mbetet e hapur për një zgjidhje diplomatike, por vetëm nëse arrihet një marrëveshje “e vërtetë dhe detyruese”. Ai shtoi se armëpushimi i brishtë mes Uashingtonit dhe Teheranit ka dështuar pas sulmeve të fundit iraniane ndaj anijeve tregtare në Ngushticën e Hormuzit.
Ndërkohë, konflikti mes Shteteve të Bashkuara dhe Iranit ka hyrë në ditën e nëntë, me të dyja palët që vijojnë shkëmbimin e sulmeve dhe tensionet në rajon mbeten të larta.
