Kryetari i Bashkisë së New Yorkut, Zohran Mamdani, ka deklaruar se po shqyrton mundësitë ligjore për arrestimin e kryeministrit izraelit Benjamin Netanyahu, nëse ai udhëton në qytet për të marrë pjesë në Asamblenë e Përgjithshme të Kombeve të Bashkuara në shtator.
Në një intervistë për The New York Times, Mamdani tha se çështja është pjesë e një “diskutimi aktiv” me departamentin ligjor të bashkisë. Ai shtoi se do të veprojë brenda kufijve që i lejon ligji.
“Unë besoj se kryeministri Netanyahu i përket Hagës. Ai është një kriminel lufte i cili po ndiqet penalisht sipas një urdhër-arresti nga Gjykata Ndërkombëtare Penale. Çfarëdo që ligji më lejon të bëj në New York, atë do ta bëjmë”, u shpreh Mamdani.
Gjykata Ndërkombëtare Penale lëshoi në nëntor 2024 një urdhër-arrest ndaj Netanyahut, duke e akuzuar për krime lufte dhe krime kundër njerëzimit të kryera gjatë luftës në Gaza. Izraeli i ka hedhur poshtë akuzat dhe nuk e njeh juridiksionin e gjykatës.
Megjithatë, çdo përpjekje për zbatimin e këtij urdhri në Shtetet e Bashkuara pritet të përballet me pengesa të mëdha ligjore, pasi SHBA nuk është palë në Statutin e Romës, traktatin mbi të cilin është themeluar Gjykata Ndërkombëtare Penale, dhe nuk e njeh juridiksionin e saj.
