Ngjarjet e ndodhura menjëherë pas finales së Kupës së Botës mes Spanjës dhe Argjentinës vijojnë të jenë në qendër të vëmendjes. Sipas mediave ndërkombëtare, FIFA pritet të hapë një hetim për incidentet që shpërthyen pas vërshëllimës së fundit në stadiumin “MetLife”, me synim identifikimin e të gjithë personave të përfshirë.
Në qendër të polemikave është mesfushori argjentinas Leandro Paredes, i cili, pasi ishte ndëshkuar me karton të verdhë gjatë ndeshjes, u përjashtua me karton të kuq pas një përplasjeje me mesfushorin spanjoll Gavi gjatë festimeve të kampionëve të rinj të botës.
Nën vëzhgim pritet të jetë edhe mbrojtësi Nahuel Molina, i cili akuzohet se goditi Rodrin në momentin kur kapiteni i Spanjës po vraponte drejt shokëve të skuadrës për të festuar triumfin.
Pas këtij episodi, situata në fushë doli jashtë kontrollit, duke u kthyer në një përleshje ku u përfshinë futbollistë të të dyja ekipeve, si edhe anëtarë të stafeve teknike. Sipas raportimeve, edhe Roberto Ayala, ish-mbrojtësi i Argjentinës dhe aktualisht pjesë e stafit të trajnerit Lionel Scaloni, dyshohet se goditi me grusht Dani Olmon gjatë kaosit.
Edhe pse FIFA nuk ka konfirmuar ende zyrtarisht nisjen e procedurave disiplinore, mediat ndërkombëtare raportojnë se organi qeverisës i futbollit botëror synon të zbardhë plotësisht ngjarjen. Nëse hetimi zyrtarizohet, në ditët në vijim priten masa disiplinore ndaj personave që do të rezultojnë përgjegjës për incidentet pas finales.
