Gjithçka është gati për finalen e madhe të Kupës së Botës 2026. Spanja dhe Argjentina do të përballen këtë të diel në stadiumin “MetLife” në New Jersey, në sfidën që do të vendosë fituesen e trofeut më prestigjioz të futbollit.
Edhe pse Argjentina vjen në finale si kampione në fuqi, basteshkruesit e konsiderojnë Spanjën si favoriten kryesore. Sipas koeficientëve të publikuar nga FanDuel Sportsbook, fitorja e Spanjës brenda 90 minutave kuotohet me 2.30, ndërsa ajo e Argjentinës me 3.60. Barazimi në kohën e rregullt vlerësohet me koeficientin 2.95.
Edhe në garën për fitimin e trofeut, pavarësisht nëse ndeshja shkon në kohën shtesë apo penallti, Spanja mbetet favorite me koeficient 1.64, ndërsa Argjentina kuotohet me 2.36 për të mbrojtur titullin botëror.
Besimi i basteshkruesve te Spanja lidhet me ecurinë e saj në këtë Botëror. Iberikët kanë fituar shtatë ndeshje radhazi, kanë pësuar vetëm një gol gjatë gjithë turneut dhe në gjysmëfinale eliminuan Francën me rezultatin 2-0.
Nga ana tjetër, Argjentina siguroi finalen pas fitores dramatike ndaj Anglisë. Skuadra e Lionel Scalonit numëron 14 fitore radhazi, ndërsa Lionel Messi ka qenë protagonisti absolut i ekipit me tetë gola dhe pesë asistime në këtë Kupë Bote.
Analisti i basteve sportive Jon Eimer e cilëson finalen si një përballje shumë të ekuilibruar, megjithatë koeficientët vijojnë të favorizojnë Spanjën për të ngritur trofeun në New Jersey.
