Portieri i Kepit të Gjelbër, Vozinha, ka folur për të ardhmen e tij pas një paraqitjeje të jashtëzakonshme në Kupën e Botës 2026, ku ishte një nga protagonistët e skuadrës së tij në aventurën historike.
Gardiani 40-vjeçar është aktualisht pa kontratë, pasi marrëveshja e tij me klubin portugez Chaves përfundoi më 30 qershor. Megjithatë, paraqitjet e tij në Botëror kanë tërhequr vëmendjen e disa klubeve.
Vozinha ishte një nga figurat kryesore të Kepit të Gjelbër në rrugëtimin deri në fazën e 1/16-tave, ku skuadra afrikane zhvilloi një betejë të fortë ndaj Argjentinës, duke humbur vetëm 2-3 pas një ndeshjeje dramatike.
Në turne, portieri zhvilloi katër ndeshje, pësoi pesë gola, mbajti dy herë portën e paprekur dhe regjistroi 18 pritje.
“Përballja me Argjentinën ishte një përvojë e jashtëzakonshme. Ne luftuam deri në fund dhe kishim mundësi reale për të fituar. I treguam botës se kemi nivel të lartë”, tha Vozinha.
Veterani portugez me origjinë nga Kepi i Gjelbër bëri të qartë se nuk mendon ende për pensionimin.
“Dua të vazhdoj të luaj edhe një ose dy vite, ndoshta tre. Do të shoh si do të reagojë trupi im. Tani jam lojtar i lirë dhe po kërkoj një projekt të mirë”, u shpreh ai.
Paraqitjet e tij në Kupën e Botës mund t’i hapin derën një tjetër aventure në karrierën e tij të gjatë.
