FIFA po shqyrton mundësinë e marrjes së masave disiplinore ndaj Argjentinës, pasi disa futbollistë të saj shfaqën një pankartë me mesazh politik pas fitores 2-1 ndaj Anglisë në gjysmëfinalen e Kupës së Botës.
Pas përfundimit të ndeshjes së zhvilluar të mërkurën, disa lojtarë argjentinas, mes tyre Lisandro Martinez, Cristian Romero dhe Giovani Lo Celso, u panë duke mbajtur një pankartë me mbishkrimin "Las Malvinas son Argentinas" ("Ishujt Falkland janë argjentinas"). Mesazhi lidhet me mosmarrëveshjen historike për sovranitetin e Ishujve Falkland (Malvinas), e cila çoi në luftën mes Argjentinës dhe Britanisë së Madhe në vitin 1982. Në atë konflikt humbën jetën 649 ushtarë argjentinas dhe 255 britanikë.
Ishujt Falkland janë një Territor Britanik i Përtejdetit në Atlantikun Jugor, por Argjentina vazhdon të pretendojë sovranitetin mbi to.
Sipas rregulloreve të FIFA-s, shfaqja e mesazheve politike gjatë aktiviteteve futbollistike është e ndaluar. Nuk është hera e parë që Argjentina përballet me këtë çështje. Në vitin 2014, Federata Argjentinase e Futbollit u gjobit me 20 mijë paund pasi futbollistët shfaqën të njëjtën pankartë përpara një ndeshjeje miqësore ndaj Sllovenisë.
Sipas The Guardian, zëdhënësi i kryeministrit britanik Keir Starmer konfirmoi se qeveria britanike mbështet kërkesën e ministrit Peter Kyle që FIFA të hetojë incidentin.
Ndërkohë, një zëdhënës i FIFA-s bëri të ditur se Komisioni i Pavarur Disiplinor po analizon raportet e ndeshjes dhe po vlerëson të gjitha rrethanat përpara se të vendosë nëse do të hapë procedurë disiplinore ndaj Argjentinës.
"Si pjesë e procedurës standarde, Komisioni i Pavarur Disiplinor i FIFA-s po shqyrton raportet e ndeshjes dhe po vlerëson të gjitha rrethanat përkatëse, përpara se të vendosë mbi hapat e mundshëm të mëtejshëm në përputhje me Kodin Disiplinor të FIFA-s", thuhet në reagimin e organit qeverisës të futbollit botëror.
Reagimi i FIFA-s vjen pasi Qeveria e Ishujve Falkland kërkoi zyrtarisht vendosjen e sanksioneve ndaj Argjentinës.
