Zinedine Zidane është një nga emrat kryesorë që përflitet për të marrë drejtimin e kombëtares së Francës pas përfundimit të ciklit të Didier Deschampsit në stolin e “Les Bleus”.
Deschamps ka udhëhequr Francën që prej vitit 2012, duke arritur suksese të mëdha, përfshirë triumfin në Kupën e Botës 2018 dhe finalen e Botërorit 2022. Megjithatë, pas më shumë se një dekade në drejtim, federata franceze pritet të nisë një kapitull të ri dhe Zidane shihet si një prej kandidatëve më të fortë për këtë post.
Ish-futbollisti legjendar francez, i cili ka fituar tre herë Ligën e Kampionëve si trajner me Real Madridin, konsiderohet një zgjedhje natyrale për të udhëhequr kombëtaren, falë figurës së tij, historisë me Francën dhe suksesit në nivel klubesh.
Në rast të një marrëveshjeje, Zidane pritet të përfitojë një pagë më të lartë se kufiri aktual i vendosur nga Federata Franceze e Futbollit (FFF) për trajnerin e kombëtares.
Sipas raportimeve, paga mujore e “Zizou” do të tejkalojë tavanin aktual prej 450 mijë eurosh në muaj, duke bërë që FFF të shqyrtojë një përjashtim të veçantë financiar për të bindur ish-trajnerin e Real Madridit.
Federata franceze pritet të marrë në konsideratë statusin e Zidane si një prej ikonave më të mëdha të futbollit francez, sukseset e tij dhe rëndësinë që do të kishte rikthimi i tij, këtë herë në rolin e trajnerit të kombëtares.
Një emërim i mundshëm i Zidane në stolin e Francës do të ishte një nga lëvizjet më të mëdha në historinë e “Les Bleus”.
