Bisedimet mes Shteteve të Bashkuara dhe Iranit vijojnë, ndërsa Uashingtoni pretendon se Teherani po përballet me pasoja të rënda pas përshkallëzimit të fundit të tensioneve mes dy vendeve.
Zëdhënësja e Shtëpisë së Bardhë, Karoline Leavitt, deklaroi se Irani po vazhdon dialogun me administratën amerikane dhe se, sipas saj, Teherani është i interesuar për arritjen e një marrëveshjeje për shkak të “goditjeve shkatërruese” që ka pësuar.
“Arsyeja e sulmeve të fundit është se Irani ka shkelur Memorandumin e Mirëkuptimit që kishim arritur me ta”, tha Leavitt, duke iu referuar veprimeve ushtarake amerikane.
Ajo pretendoi gjithashtu se Irani ka sulmuar anije tregtare në Ngushticën e Hormuzit, një prej korridoreve më të rëndësishme detare në botë për transportin e energjisë.
Megjithatë, zëdhënësja e Shtëpisë së Bardhë theksoi se Uashingtoni mbetet i hapur për një zgjidhje diplomatike.
“Presidenti është gjithmonë i hapur ndaj diplomacisë”, u shpreh Leavitt, pa dhënë detaje të mëtejshme mbi ecurinë e negociatave apo mundësinë e një marrëveshjeje të re mes dy vendeve.
Tensionet mes SHBA-së dhe Iranit janë rritur ndjeshëm ditët e fundit, ndërsa të dyja palët kanë shkëmbyer akuza dhe veprime ushtarake në një nga zonat më strategjike të Lindjes së Mesme.
