Shtetet e Bashkuara kanë ndërmarrë një valë të re sulmesh ajrore ndaj objektivave ushtarake në Iran, ndërsa presidenti Donald Trump paralajmëroi Teheranin se “më mirë të sillet siç duhet”, në të kundërt do të përballet me pasoja të tjera.
Komanda Qendrore e SHBA-së bëri të ditur se sulmet kishin në shënjestër kapacitete ushtarake iraniane që, sipas saj, përdoreshin për të kërcënuar anijet tregtare që kalojnë në Ngushticën e Hormuzit. Ndërkohë, mediat shtetërore iraniane raportuan se alarmet e mbrojtjes ajrore u aktivizuan edhe në kryeqytetin Teheran.
Nga ana tjetër, Irani deklaroi se ka goditur objektiva ushtarake amerikane në rajon, përfshirë baza në Bahrein dhe Kuvajt, duke shënuar ditën e pestë të përshkallëzimit të ri të konfliktit, pavarësisht marrëveshjes paraprake për t’i dhënë fund luftimeve.
Negociatori kryesor iranian, Mohammad Bagher Ghalibaf, tha se Teherani “nuk ka asnjë arsye” të respektojë marrëveshjen nëse ajo nuk sjell përfitime për Iranin. Ai theksoi se siguria kombëtare e vendit varet nga ruajtja e kontrollit iranian mbi Ngushticën e Hormuzit dhe se negociatat, njësoj si lufta, janë pjesë e strategjisë së rezistencës së Republikës Islamike.
Një ditë më parë, Trump kishte kërcënuar se SHBA mund të godasë ura dhe centrale energjetike nëse Irani nuk rikthehet në tryezën e bisedimeve javën e ardhshme. I pyetur nëse do t’i vendoste një afat Teheranit, presidenti amerikan u përgjigj: “Nuk më pëlqen të vendos afate, por ata e dinë shumë mirë situatën… më mirë të sillen siç duhet.”
Më vonë, gjatë një samiti për mbrojtjen, Trump deklaroi se Irani “nuk është i lumtur tani” dhe shtoi se autoritetet iraniane “duan shumë të arrijnë një marrëveshje”, por theksoi se Uashingtoni do të vendosë nëse do të vazhdojë negociatat apo do ta çojë konfliktin deri në fund.
