Kryeministri izraelit, Benjamin Netanyahu, ka lëshuar një paralajmërim të fortë ndaj Iranit, duke deklaruar se çdo sulm i mundshëm ndaj Izraelit do të marrë një përgjigje shumë më të ashpër se në përplasjet e mëparshme.
Gjatë një konference në Dimona, një qytet në shkretëtirën izraelite pranë reaktorit bërthamor të vendit, Netanyahu tha se Izraeli është i përgatitur për çdo skenar dhe i bëri thirrje udhëheqjes iraniane të mos llogarisë në një reagim të ngjashëm me atë të mëparshëm.
"Jemi të përgatitur për çdo skenar. U them udhëheqësve të Iranit: Mos prisni qetësi nëse na sulmoni. Mos prisni një përsëritje të asaj që ka ndodhur më parë, sepse kësaj radhe përgjigjja do të jetë krejtësisht ndryshe dhe shumë më e fuqishme", u shpreh Netanyahu.
Ai theksoi se Izraeli nuk do të tolerojë sulme ndaj territorit të tij, duke shtuar se "ditët kur dikush na lëndon dhe ne nuk kundërpërgjigjemi dy herë më fort kanë mbaruar".
Netanyahu shtoi se Izraeli ka vepruar në të njëjtën mënyrë ndaj asaj që e quajti "Boshti i së Keqes" i udhëhequr nga Irani dhe se do të vazhdojë të reagojë me forcë ndaj çdo kërcënimi kundër sigurisë së vendit.
