Një pilot i kompanisë britanike Ravenair ka tërhequr vëmendjen në Mbretërinë e Bashkuar pasi gjatë një fluturimi testues dyorësh shkroi në qiell mesazhin “I’m bored” (“Jam i mërzitur”), duke përdorur trajektoren e avionit.
Sipas të dhënave të platformës Flightradar24, avioni u nis nga Liverpool dhe për rreth 20 minuta fluturoi në mënyrë të tillë mbi zonën kufitare mes Anglisë dhe Uellsit, sa formoi qartë fjalët në hartën e fluturimit.
Kompania Ravenair sqaroi se bëhej fjalë për një fluturim testues, pasi në avion ishte zëvendësuar një cilindër i motorit dhe duhej verifikuar funksionimi i tij. Menaxheri i operacioneve, Wayne Barrett, tha me humor se piloti “ndoshta ishte pak i mërzitur”, por shtoi se manovra kërkonte aftësi të konsiderueshme pilotimi.
Avioni rezultoi plotësisht i sigurt për fluturime të tjera dhe piloti nuk do të përballet me masa disiplinore. “Avioni është kthyer në hangar dhe piloti tani është në ditën e tij të pushimit,” tha Barrett.
Nuk është hera e parë që pilotët përdorin trajektoren e fluturimit për të dërguar mesazhe. Në vitin 2020, një pilot në Austri shkroi në qiell mesazhin “Stay Home” (“Qëndroni në shtëpi”) gjatë pandemisë së COVID-19.
