Qeveria e kryeministres italiane Giorgia Meloni ka pësuar një humbje të rëndësishme politike në Dhomën e Deputetëve, pasi amendamenti më i rëndësishëm i reformës së saj zgjedhore u rrëzua me vetëm një votë diferencë. Në votimin e fshehtë, 188 deputetë votuan kundër dhe 187 pro, duke nxjerrë në pah përçarje brenda shumicës qeverisëse.
Amendamenti, i paraqitur nga Fratelli d’Italia, së bashku me Noi Moderati dhe UDC, synonte rikthimin e votës preferenciale në zgjedhjet parlamentare. Propozimi do t’u jepte qytetarëve mundësinë të zgjidhnin deri në tre kandidatë nga lista e partisë, në vend që renditja e deputetëve të përcaktohej kryesisht nga drejtuesit politikë. Ai ishte pjesë e paketës së reformës zgjedhore të promovuar nga koalicioni i djathtë i Melonit.
Reforma parashikon zëvendësimin e sistemit aktual me një model proporcional, të shoqëruar me një bonus mandatesh për koalicionin fitues nëse kalon pragun e parashikuar të votave, me argumentin se kjo do të garantonte stabilitet qeverisës. Megjithatë, rrëzimi i amendamentit konsiderohet një goditje serioze për autoritetin e Melonit, pasi besohet se rreth 30 deputetë të shumicës nuk e mbështetën propozimin në votimin e fshehtë.
Menjëherë pas rezultatit, opozita shpërtheu në thirrje për zgjedhje të parakohshme dhe dorëheqjen e kryeministres. Deputetët e Partisë Demokratike, Lëvizjes Pesë Yje dhe Aleancës së Gjelbër e të Majtë protestuan në sallën e Parlamentit.
Sekretarja e Partisë Demokratike, Elly Schlein, deklaroi: “Ka ardhur koha të shkoni në shtëpi dhe t’i jepni Italisë një qeveri të aftë të zgjidhë problemet e italianëve. Pranoni dështimin tuaj dhe largohuni.” Ndërsa ish-kryeministri Giuseppe Conte tha se shumica “i ka hequr besimin kryeministres së saj” dhe kërkoi që vendi të shkojë në zgjedhje të reja.
