Sekretari amerikan i Mbrojtjes, Pete Hegseth, ka prezantuar një program të ri shëndetësor që parashikon testimin e detyrueshëm të niveleve të testosteronit për të gjithë ushtarakët aktivë dhe rezervistët mbi moshën 30 vjeç.
Sipas Pentagonit, testimi do të përfshihet në kontrollet periodike shëndetësore dhe synon të identifikojë rastet e mungesës së testosteronit, hormon që lidhet me energjinë, forcën fizike, masën muskulore dhe mirëqenien e përgjithshme të organizmit.
Në një video të publikuar në platformën X, Hegseth e quajti iniciativën "Departamenti i Testosteronit të Lartë", duke theksuar se synimi është që ushtarët të kenë nivelet e nevojshme hormonale për të performuar në kapacitetin e tyre maksimal.
Personelit që do të rezultojë me nivele të ulëta të testosteronit do t'i ofrohet terapi zëvendësuese hormonale në mënyrë vullnetare dhe vetëm nën mbikëqyrje mjekësore.
Zëdhënësi i Pentagonit, Sean Parnell, sqaroi se kontrolli do të jetë i detyrueshëm për ushtarakët aktivë dhe rezervistët mbi 30 vjeç, ndërsa ata nën këtë moshë do të kenë mundësi ta kryejnë testimin me kërkesë.
"Ky program do t'i mundësojë Departamentit të krijojë një bazë të plotë të dhënash dhe të ofrojë terapi të synuara, duke mbështetur një forcë ushtarake të shëndetshme dhe të aftë", deklaroi Parnell.
Pentagoni theksoi se programi nuk lidhet me përdorimin e hormoneve për rritje artificiale të masës muskulore. Marrja e testosteronit pa indikacion mjekësor dhe pa recetë mbetet e ndaluar për personelin ushtarak.
Njoftimi ka shkaktuar reagime të ndryshme në politikën amerikane. Senatorja demokrate Tammy Duckworth, veterane e luftës në Irak, kërkoi që testimi hormonal të jetë i disponueshëm si për burrat, ashtu edhe për gratë në ushtri.
Nga ana tjetër, kongresmenia Chrissy Houlahan e kritikoi iniciativën, duke e cilësuar atë pjesë të "luftës kulturore" të promovuar nga Hegseth.
Ekspertët kujtojnë se nivelet e testosteronit tek meshkujt bien natyrshëm pas moshës 30–40 vjeç. Mungesa e këtij hormoni mund të shkaktojë lodhje, ulje të dëshirës seksuale, ndryshime humori dhe humbje të masës muskulore. Sipas vlerësimeve, testosteroni i ulët prek rreth 10–40% të burrave të moshuar në mbarë botën.
Profesori i urologjisë në Kolegjin e Mjekësisë Baylor, Dr. Mohit Khera, vlerësoi se kontrolli i testosteronit mund të jetë i dobishëm për shëndetin e përgjithshëm, veçanërisht tek ushtarakët që kërkojnë performancë të lartë fizike. Megjithatë, ai paralajmëroi se terapia hormonale nuk duhet të përdoret pa simptoma dhe pa një vlerësim të kujdesshëm mjekësor, pasi mund të shoqërohet me efekte anësore, përfshirë infertilitetin tek meshkujt e rinj dhe rritjen e mundshme të rrezikut kardiovaskular.
Vendimi i Pentagonit vjen në një periudhë kur administrata amerikane po shqyrton zgjerimin e aksesit ndaj terapive me testosteron dhe përdorimit të tyre në praktikën mjekësore.
