FIFA ka sqaruar një nga çështjet më të diskutuara para finales së shumëpritur të Kupës së Botës mes Spanjës dhe Argjentinës, që do të luhet këtë të diel në stadiumin “MetLife” në New Jersey.
Institucioni ndërkombëtar i futbollit ka bërë të ditur se pushimi mes dy pjesëve nuk do të zgjasë më shumë se 17 minuta, duke hedhur poshtë zërat se spektakli i pjesës së parë mund të shtynte rifillimin e ndeshjes për më shumë se 30 minuta.
Nga kjo kohë, rreth 11 minuta do t’i dedikohen performancave muzikore të artistëve të ftuar, ndërsa pjesa tjetër, rreth 6 minuta, do të përdoret për vendosjen dhe largimin e skenës, si dhe për mirëmbajtjen e fushës.
Kohët e fundit ishte raportuar se numri i madh i artistëve të përfshirë në ceremoninë e finales mund të sillte një pushim rekord, por FIFA ka konfirmuar se ai do të jetë vetëm dy minuta më i gjatë se pushimi standard prej 15 minutash në një ndeshje futbolli.
Një nga çështjet që ka marrë vëmendje të veçantë është edhe gjendja e barit në stadiumin “MetLife”. Stafi teknik i Spanjës ka shprehur shqetësime për terrenin, pasi në ndeshjet e mëparshme fusha është konsideruar më e thatë se zakonisht, duke ndikuar në ritmin e lojës.
Për këtë arsye, organizatorët kanë planifikuar ujitjen e fushës gjatë pushimit, me synimin për të krijuar kushte optimale për të dyja skuadrat.
Ndërkohë, FIFA nuk do të ndryshojë rregullin për pushimet e hidratimit. Për shkak të temperaturave të larta gjatë turneut, lojtarët do të kenë sërish të drejtën për dy ndërprerje hidratimi, nga një në secilën pjesë të ndeshjes.
Finalja Spanjë-Argjentinë pritet të jetë një nga përballjet më të ndjekura të Botërorit, jo vetëm për shkak të rivalitetit sportiv, por edhe për shkak të spektaklit të madh të planifikuar jashtë fushës.
