Pak orë kanë mbetur nga finalja e madhe e Kupës së Botës 2026, ku Spanja dhe Argjentina do të përballen në stadiumin “MetLife” në New Jersey për trofeun më të rëndësishëm të futbollit botëror.
Për herë të parë në histori, në finalen e Botërorit përballen kampionia në fuqi e Evropës dhe kampionia në fuqi e Amerikës së Jugut. Sondazhi i organizuar nga FIFA dhe koeficientët e basteve favorizojnë Spanjën, ndërsa edhe simulimi i lojës EA Sports FC ka parashikuar triumfin e iberikëve.
Spanja vjen në finale pas një turneu pothuajse perfekt, me vetëm një gol të pësuar gjatë gjithë kompeticionit dhe gjashtë ndeshje radhazi pa pësuar gol. Nga ana tjetër, Argjentina e Lionel Scalonit synon të mbrojë titullin e fituar katër vite më parë dhe të bëhet vetëm kombëtarja e tretë në histori që fiton dy Kupa Bote radhazi.
Një nga temat më të diskutuara mbetet përballja mes Lionel Messit dhe Lamine Yamal. Për Messin kjo pritet të jetë ndeshja e fundit në një Kupë Bote, ndërsa ai synon të fitojë titullin e dytë radhazi, të mbetet në garë për “Këpucën e Artë” dhe të forcojë kandidaturën për një tjetër “Top të Artë”. Në krahun tjetër, Yamal kërkon të udhëheqë Spanjën drejt titullit të dytë botëror dhe të hyjë në historinë e futbollit.
Edhe jashtë fushës nuk kanë munguar debatet. Sulmuesi i Spanjës, Borja Iglesias, ka kritikuar FIFA-n për çmimet e larta të biletave të finales, ndërsa presidenti i FIFA-s, Gianni Infantino, e ka cilësuar Botërorin 2026 si ngjarjen më të jashtëzakonshme në historinë e sportit.
Bilanci historik mes dy kombëtareve është i ekuilibruar, me nga gjashtë fitore për secilën dhe dy barazime, çka e bën edhe më të paparashikueshme sfidën që do të vendosë kampionin e ri të botës. Sonte, vëmendja e miliona tifozëve do të jetë e përqendruar në New Jersey, aty ku do të shkruhet kapitulli i fundit i Botërorit 2026.
