Presidenti amerikan Donald Trump ka fajësuar Kanadanë për tymin e shkaktuar nga zjarret e mëdha pyjore, i cili ka mbuluar zona të gjera në Shtetet e Bashkuara, duke paralajmëruar se kostoja e ndotjes mund të përfshihet në tarifat ndaj importeve kanadeze.
“Ne e mbajmë Kanadanë përgjegjëse për faktin se nuk po mirëmban siç duhet pyjet dhe zonat me shkurre, ndërsa SHBA-ja po përballet me ajër të ndotur dhe të pashëndetshëm”, deklaroi Trump.
Presidenti amerikan tha se do të kontaktojë kryeministrin kanadez për të diskutuar masat që Ottawa do të ndërmarrë, duke akuzuar Kanadanë për mungesë menaxhimi të pyjeve dhe largimit të mbetjeve.
Sipas Trumpit, kjo situatë është kthyer në një problem të përsëritur që i kushton Shteteve të Bashkuara “miliarda dollarë”, ndaj ai kërkoi që kostoja e ndotjes t’u shtohet tarifave që Kanadaja paguan aktualisht.
Deklaratat e tij vijnë ndërsa tymi nga zjarret masive në Kanada është përhapur drejt jugut, duke ndikuar në cilësinë e ajrit në qytete të mëdha amerikane si Detroit, Chicago dhe Washington, të cilat janë renditur ndër zonat urbane me nivelet më të larta të ndotjes së ajrit.
