Presidenti i Shteteve të Bashkuara, Donald Trump, ka paralajmëruar vendosjen e tarifave shtesë ndaj Kanadasë, duke e akuzuar se nuk po menaxhon siç duhet zjarret në pyje, tymi i të cilave ka përfshirë një pjesë të madhe të verilindjes së SHBA-së.
Në një postim në rrjetin social Truth Social, Trump deklaroi se Kanadaja ka lejuar që “ajri i ndotur dhe i pashëndetshëm” të kalojë kufirin, duke i shkaktuar Shteteve të Bashkuara dëme ekonomike me vlerë miliarda dollarë.
“Ne e mbajmë Kanadanë përgjegjëse për faktin se nuk po kujdeset siç duhet për pyjet dhe shkurret e saj. Kjo është neglizhencë e dukshme dhe po kthehet në një problem të përvitshëm”, shkroi Trump, duke shtuar se këto kosto duhet t’i shtohen tarifave që, sipas tij, Kanadaja paguan ndaj SHBA-së.
Presidenti amerikan tha gjithashtu se planifikon të zhvillojë një bisedë telefonike me kryeministrin kanadez, Mark Carney, për të diskutuar masat që Otava do të ndërmarrë për përballimin e zjarreve.
Nga ana tjetër, kryeministri i Ontarios, Doug Ford, hodhi poshtë kritikat e politikanëve amerikanë, duke kujtuar ndihmën që Kanadaja ka ofruar ndër vite gjatë zjarreve dhe uraganeve në SHBA. “Në vend që të ankoheni, ndoshta duhet të dërgoni mbështetje dhe ndihmë”, u shpreh ai.
Situata me zjarret në Kanada është përkeqësuar që nga fundi i qershorit për shkak të temperaturave të larta dhe thatësirës. Aktualisht raportohen rreth 900 vatra aktive, ndërsa tymi ka përfshirë edhe qytetin e Nju Jorkut, ku Indeksi i Cilësisë së Ajrit ka kaluar nivelin 200 në disa zona, duke u klasifikuar si “shumë i pashëndetshëm”.
Autoritetet kanë lëshuar alarme për cilësinë e ajrit në Nju Jork, Long Island dhe pjesë të veriut të Nju Xhersit, përfshirë zonën ku ndodhet stadiumi MetLife. Banorëve, veçanërisht fëmijëve dhe personave me probleme të zemrës apo frymëmarrjes, u është rekomanduar të kufizojnë aktivitetet në natyrë, të qëndrojnë brenda sa më shumë të jetë e mundur dhe të përdorin maska mbrojtëse N95 ose KN95.
Debati mes Uashingtonit dhe Otavës zhvillohet vetëm pak ditë përpara finales së Kupës së Botës, e cila pritet të luhet në stadiumin MetLife në East Rutherford të New Jersey, ku pritet të jenë të pranishëm rreth 80 mijë spektatorë.
