Të paktën 14 palestinezë janë vrarë në sulme izraelite në pjesë të ndryshme të Rripit të Gazës, ndërsa më shumë se gjysma e viktimave humbën jetën gjatë një sulmi që goditi një kortezh mortor në kampin e refugjatëve Nuseirat.
Sipas Al Jazeera, tetë persona u vranë dhe rreth 20 të tjerë u plagosën pasi një dron izraelit goditi një grup njerëzish të mbledhur pranë xhamisë Ahmad Yassin, teksa po përgatiteshin të përcillnin për në banesën e fundit një palestinez të vrarë më herët gjatë ditës në një tjetër sulm izraelit.
Ushtria izraelite konfirmoi se kishte kryer sulmin, duke deklaruar se kishte në shënjestër një “qelizë terroriste” në Gazën qendrore. Ajo shtoi se është në dijeni të raportimeve për viktima civile dhe se rrethanat e sulmit po verifikohen.
Sulme të tjera gjatë së njëjtës ditë u raportuan edhe në Beit Lahia, Az-Zawayda, Al-Sawarha, Gaza City dhe Khan Younis, duke e çuar numrin e përgjithshëm të viktimave në të paktën 14. Sipas Al Jazeera, pavarësisht armëpushimit të shpallur në tetor 2025, sulmet izraelite në Gaza kanë vijuar pothuajse çdo ditë.
