Korporata Kombëtare e Naftës së Libisë ka njoftuar zbulimin e një fushe të re nafte, të quajtur “Eassar”, me rezerva të vlerësuara prej rreth 195 milionë fuçish naftë.
Zbulimi u realizua nga kompania austriake OMV, pas shpimit të pusit B1-106/4 dhe vlerësimit të planit të zhvillimit, i cili konfirmoi se fusha është ekonomikisht e leverdishme për shfrytëzim.
Sipas NOC, fusha e re ndodhet në pellgun Sirte, në Libinë qendrore, një nga zonat më të rëndësishme naftëmbajtëse të vendit, dhe përfshin rezervuarët Sabil i Poshtëm dhe i Sipërm.
Autoritetet libiane bëjnë me dije se fusha pritet të ketë një kapacitet fillestar prodhimi prej rreth 5 mijë fuçi naftë në ditë.
Zhvillimi i projektit do të mbikëqyret nga Kompania e Operacioneve të Naftës Zueitina, një degë e NOC-së, ndërsa afërsia me infrastrukturën ekzistuese pritet të përshpejtojë nisjen e prodhimit.
Zbulimi shihet si një hap i rëndësishëm për rritjen e prodhimit të naftës në Libi, një vend që mbështetet fuqishëm te sektori energjetik. Nafta përbën rreth 90% të të ardhurave të buxhetit shtetëror, ndërsa Libia zotëron rezervat më të mëdha të provuara të naftës në Afrikë.
Aktualisht, vendi prodhon mbi 1.4 milion fuçi naftë në ditë dhe është i përjashtuar nga kufizimet e prodhimit të vendosura nga OPEC.
