Presidenti i Libanit, Joseph Aoun, është nisur drejt Washingtonit për një vizitë zyrtare, ku më 21 korrik do të zhvillojë një takim me presidentin amerikan Donald Trump.
Sipas një zyrtari të lartë libanez, në fokus të bisedimeve do të jenë marrëdhëniet dypalëshe, situata e sigurisë, zhvillimet ekonomike dhe negociatat e drejtpërdrejta mes Libanit dhe Izraelit.
Burimi bëri të ditur se një nga temat kryesore do të jetë zbatimi i marrëveshjes kornizë të ndërmjetësuar nga SHBA-ja, e cila synon forcimin e armëpushimit dhe tërheqjen graduale të forcave izraelite nga territoret libaneze të pushtuara.
Në takim pritet të diskutohet edhe mbështetja amerikane për Forcat e Armatosura të Libanit, si dhe e ardhmja e misionit paqeruajtës të OKB-së UNIFIL, mandati i të cilit skadon këtë vit.
Në axhendë do të jenë gjithashtu masat për të ndihmuar ekonominë libaneze, e cila vazhdon të përballet me një krizë të thellë financiare.
Vizita e Aoun vjen pas raundit të gjashtë të negociatave mes Libanit dhe Izraelit, të zhvilluara në Romë me ndërmjetësimin e SHBA-së. Në fund të qershorit, të dyja palët nënshkruan një marrëveshje kornizë që parashikon tërheqjen graduale të Izraelit nga territoret libaneze, ndërsa ushtria libaneze do të marrë përgjegjësinë për sigurinë në zonat e liruara.
Sipas autoriteteve libaneze, që nga 2 marsi, sulmet izraelite në Liban kanë shkaktuar mbi 4.300 viktima dhe 12.200 të plagosur.
