Irani ka njoftuar pezullimin e zbatimit të angazhimeve të tij në kuadër të memorandumit të fundit të mirëkuptimit me Shtetet e Bashkuara, duke akuzuar Uashingtonin se ka shkelur marrëveshjen.
Zv/ministri i Jashtëm iranian, Kazem Gharibabadi, deklaroi se SHBA-ja “ka shkelur dhe pezulluar të gjitha zotimet e saj” në kuadër të memorandumit të mirëkuptimit të arritur në Islamabad.
“Edhe ne kemi pezulluar zotimet tona, nuk po i zbatojmë ato dhe jemi të angazhuar me mbrojtjen e vendit”, tha Gharibabadi në një deklaratë të publikuar nga agjencia gjysmëzyrtare iraniane Fars.
Vendimi i Teheranit vjen në një kohë kur tensionet mes Iranit dhe SHBA-së janë rritur ndjeshëm, me dy vendet që vazhdojnë shkëmbimet e sulmeve në Lindjen e Mesme.
Memorandumi i mirëkuptimit, i ndërmjetësuar nga Pakistani dhe i nënshkruar në qershor, kishte si synim ndalimin e përshkallëzimit ushtarak dhe hapjen e rrugës për një marrëveshje më të gjerë paqeje. Megjithatë, zhvillimet e fundit kanë rikthyer pasigurinë mbi të ardhmen e dialogut mes dy palëve.
