Presidenti i SHBA-së, Donald Trump, ka urdhëruar Komandën Qendrore të SHBA-së (CENTCOM) të nisë sulme ushtarake kundër Iranit, si kundërpërgjigje ndaj sulmit me raketa dhe dronë në Jordani, ku humbën jetën dy ushtarë amerikanë.
Sipas zyrtarëve amerikanë, Trump ka paralajmëruar se “portat e ferrit do të hapen” kundër Iranit, ndërsa operacionet ushtarake amerikane kanë hyrë në javën e parë, me sulme të përditshme ndaj objektivave ushtarake dhe infrastrukturës në jug të Iranit, kryesisht pranë Ngushticës së Hormuzit.
Paralelisht, Departamenti Amerikan i Shtetit ka lëshuar një paralajmërim global për sigurinë, duke u bërë thirrje qytetarëve amerikanë, veçanërisht atyre në Lindjen e Mesme, të tregojnë kujdes të shtuar për shkak të rrezikut të një përshkallëzimi të mëtejshëm të konfliktit.
Në deklaratë thuhet se mjedisi i sigurisë mbetet i paqëndrueshëm dhe se grupet e mbështetura nga Irani mund të shënjestrojnë interesa amerikane dhe objekte diplomatike të SHBA-së në vende të ndryshme të botës.
Sulmi iranian në Jordani, që nxiti reagimin e Uashingtonit, la të vrarë dy ushtarë amerikanë, një tjetër rezulton i zhdukur, ndërsa katër ushtarë u plagosën dhe morën trajtim mjekësor përpara se të dilnin nga spitali. Disa ushtarë të tjerë me plagë të lehta janë rikthyer në detyrë.
