Një ngjarje e rëndë ka tronditur Italinë, pasi një 42-vjeçar me origjinë marokene humbi jetën gjatë një ndërhyrjeje të policisë në lagjen Pilastro të Bolonjës. Viktima, Abderrahim Fakir, u filmua teksa bërtiste vazhdimisht “Ndihmë, ndihmë, mjaft!”, ndërsa mbahej i shtrirë në tokë nga dy efektivë policie dhe një civil që i bllokonte këmbët.
Sipas dëshmitarëve dhe pamjeve që po qarkullojnë në media, Fakir bërtiti për rreth pesë ose gjashtë minuta, derisa zëri iu shua dhe nuk dha më shenja jete. Ai u prangos dhe iu lidhën edhe këmbët, ndërsa ekipet e Kryqit të Kuq dhe mjekët prisnin që situata të vihej nën kontroll për ta sedatuar. Kur trupi u kthye në krah, 42-vjeçari ishte pa ndjenja dhe fytyra e tij ishte e mbuluar me gjak.
Ngjarja ndodhi pasi banorët njoftuan policinë se burri po sillej në mënyrë agresive, duke dëmtuar edhe një automjet. Sipas autoriteteve, ai ishte jashtë kontrollit dhe mund të kishte qenë nën ndikimin e alkoolit ose lëndëve narkotike. Për ta neutralizuar, policia përdori fillimisht spraj irritues dhe më pas e immobilizoi në tokë me ndihmën edhe të disa qytetarëve.
Prokuroria e Bolonjës ka nisur një hetim për të zbardhur rrethanat e vdekjes. Janë sekuestruar pamjet e kamerave trupore të policëve dhe pritet kryerja e autopsisë. Nga këqyrja paraprake mjeko-ligjore dyshohet se 42-vjeçari mund të ketë pësuar arrest kardiak, por ekspertiza do të përcaktojë nëse në vdekje kanë ndikuar edhe faktorë të tjerë, si presioni i ushtruar gjatë immobilizimit, përdorimi i sprajit, temperaturat e larta apo substanca të mundshme të konsumuara.
Familjarët e viktimës akuzojnë policinë për përdorim të tepruar të forcës. “E trajtuan si kafshë. Ai kërkonte vetëm ndihmë dhe e vranë”, deklaroi motra e tij, ndërsa vëllai kërkoi që e vërteta të dalë në dritë. Më vonë, disa të afërm bënë thirrje për qetësi, duke theksuar se kërkojnë vetëm drejtësi dhe besojnë te hetimi i drejtësisë italiane.
