Një ngjarje tronditëse ka ndodhur në Itali, ku gazetari sportiv Luigi “Luca” Esposito, 53 vjeç, është gjetur i pajetë dhe i djegur në një zonë bujqësore në Eboli, në provincën e Salernos. Prokuroria italiane ka hapur hetime për vrasje, ndërsa dyshohet se ai është ekzekutuar me armë zjarri përpara se autorët t’i vinin flakën trupit.
Trupi i karbonizuar u zbulua në orët e para të mëngjesit pranë rrugës shtetërore SS7 Bis, pas një telefonate në numrin e emergjencës rreth orës 03:00. Në vendngjarje, karabinierët gjetën edhe gëzhoja plumbash, çka forcoi dyshimet se bëhej fjalë për një ekzekutim.
Për shkak të djegieve të rënda, fillimisht nuk ishte e mundur të përcaktohej as gjinia e viktimës. Identifikimi u bë vetëm pasi hetuesit gjetën pranë vendit të ngjarjes automjetin e regjistruar në emër të Espositos dhe më pas konfirmuan se ai rezultonte i zhdukur.
Luigi Esposito, i njohur nga të gjithë si Luca, jetonte në Eboli dhe ishte një emër i njohur i gazetarisë sportive. Ai bashkëpunonte me të përditshmen La Città di Salerno, televizionin Otto Channel dhe drejtonte portalin sportiv Tuttosalernitana.com. Gjithashtu kishte bashkëpunuar edhe me media të tjera sportive italiane.
Drejtori i Otto Channel, Pierluigi Melillo, e cilësoi vrasjen si një ngjarje që ka tronditur opinionin publik.
“Jemi të shokuar dhe të pikëlluar, por mbi të gjitha të pabesueshëm përballë këtij ekzekutimi të tmerrshëm. Luca ishte një bashkëpunëtor i çmuar, gjithmonë i guximshëm në mbrojtjen e opinioneve të tij.”
Sipas kolegëve, Esposito ishte një komentator sportiv i njohur, shpesh polemizues, por gjithmonë i respektuar për profesionalizmin dhe pavarësinë e mendimit.
Karabinierët dhe Prokuroria e Salernos po vijojnë hetimet për të zbardhur motivet dhe autorët e krimit, ndërsa pista kryesore mbetet ajo e vrasjes së qëllimshme, e ndjekur nga tentativa për të zhdukur gjurmët duke i vënë flakën trupit të viktimës.
