Një sasi prej mbi 770 kilogramësh kokainë ekstra të pastër është sekuestruar nga autoritetet italiane në portin e Vado Ligure, në një nga operacionet më të mëdha antidrogë të viteve të fundit.
Operacioni u zhvillua nga Guardia di Finanza në bashkëpunim me Agjencinë e Doganave. Droga ishte fshehur në 650 pako, të vendosura mes dhjetëra paletave me banane brenda një kontejneri frigoriferik që kishte mbërritur nga një prej porteve kryesore të Ekuadorit.
Sipas autoriteteve, vlera e ngarkesës në tregun e zi arrin në rreth 250 milionë euro.
Hetimet vijojnë për të identifikuar organizatën kriminale që qëndron pas trafikut dhe destinacionin përfundimtar të drogës. Ky është sekuestrimi i dytë i madh në portin e Vado Ligure brenda pak javësh, pasi më herët autoritetet italiane bllokuan edhe 340 kilogramë kokainë.
