Presidenti i Shteteve të Bashkuara, Donald Trump, ka deklaruar se Kina dhe Rusia nuk po furnizojnë Iranin me armë, duke theksuar se këtë garanci e ka marrë personalisht nga presidenti kinez Xi Jinping dhe homologu rus Vladimir Putin.
Sipas Trump, gjatë takimit të fundit në Pekin, Xi Jinping i ka premtuar se as shteti kinez dhe as kompanitë kineze nuk do t’i japin apo shesin armë Republikës Islamike të Iranit në asnjë rrethanë. Presidenti amerikan tha se i beson këtij premtimi, duke nënvizuar se marrëdhëniet mes dy vendeve janë të tilla që e bëjnë të besueshme fjalën e liderit kinez. Ai shtoi gjithashtu se Shtetet e Bashkuara po i bëjnë Kinës “favore të mëdha”.
Trump deklaroi se të njëjtin qëndrim ka marrë edhe nga presidenti rus Vladimir Putin, i cili, sipas tij, i ka bërë të ditur se Moska nuk ka ndërmend t’i shesë armë Teheranit, pavarësisht tensioneve ndërkombëtare dhe luftës në Ukrainë.
Presidenti amerikan theksoi se Rusia është në dijeni se SHBA-ja nuk po furnizon drejtpërdrejt Ukrainën me armë, por ua shet ato vendeve anëtare të NATO-s, të cilat më pas vendosin vetë për përdorimin dhe transferimin e tyre.
Sipas Trumpit, dy fuqitë që përmenden më shpesh si aleate të Iranit, Kina dhe Rusia, nuk janë të përfshira në furnizimin ushtarak të Teheranit. Ai paralajmëroi se një veprim i tillë do të ishte “shumë i keq” për të dyja vendet dhe nuk do të ishte në interesin e tyre.
Deklaratat e presidentit amerikan vijnë në një kohë kur Irani ka bërë të ditur se po zhvillon konsultime të përditshme me Kinën dhe Rusinë lidhur me konfliktin e vazhdueshëm me Shtetet e Bashkuara dhe Izraelin.
