Protestuesit janë mbledhur edhe këtë mbrëmje para Kryeministrisë, në ditën e 55-të të protestës së tyre, duke përsëritur kërkesën për dorëheqjen e kryeministrit Edi Rama dhe krijimin e një qeverie tranzitore.
Në fjalën e mbajtur gjatë tubimit, një prej protestuesve iu përgjigj edhe dokumentit të prezantuar sot nga kryeministri Rama, të quajtur “Besa”, duke deklaruar se “nuk ka besë” për kreun e qeverisë.
“Nuk ka besë për ty, kryeministër, pasi vetëm dje i preve në besë qytetarët që protestojnë prej 55 ditësh. Po përpiqesh të na frikësosh që të shkojmë në shtëpi dhe ti të vazhdosh i qetë, por këtë pushtet kriminal nuk do ta lejojmë”, u shpreh ai.
Sipas protestuesve, Rama ndodhet nën presionin e protestës së përditshme dhe e vetmja rrugëdalje për të mbetet dorëheqja.
“Kryeministri ishte vetëm fizikisht aty, por fytyra i kishte ikur, sepse prej 55 ditësh na sheh në ëndërr. Do të jemi këtu derisa ai të japë dorëheqjen. Ai e di se nuk ka shpëtim dhe i vetmi shpëtim nga ky makth është dorëheqja. Pas dorëheqjes e pret drejtësia”, deklaroi protestuesi.
Gjatë tubimit u përsërit edhe kërkesa për ngritjen e një qeverie tranzitore, me argumentin se vendi ka nevojë për një periudhë kalimtare për rikthimin e funksionimit normal të demokracisë dhe institucioneve. Protestuesit paralajmëruan se do të vijojnë tubimet deri në plotësimin e kërkesave të tyre.
