Në seancën gjyqësore në Gjykatën Administrative, ku po shqyrtohet padia e Erion Veliajt kundër prokurorit të posaçëm Ols Dado, ishte radha e avokatit mbrojtës të kryebashkiakut të shprehej lidhur me kërkesën e “Asociacionit Kombëtar të Medias dhe Drejtësisë” për të hyrë si palë në këtë çështje.
Sipas Plarent Ndrecës, që mbron interesat e Veliajt, kërkesa e shoqatës për ndërhyrje kryesore në gjykim duhet pranuar. “Shoqata ka theksuar edhe lidhjen e Ols Dados me çështjen e 21 Janarit. Kur statusi i një prokurori kontestohet si i paligjshëm. Nuk është thjesht kuriozitet publik, por pjesë e të drejtës për informimin publik. Pranimi i kërkesës nuk do ta ngarkonte gjykimin, por do ta bënte atë më të plotë. Shoqata nuk do të cenonte të drejtat e palëve për mbrojtje. Veliaj ka interes që gjykimi të zhvillohet në mënyrë sa më të plotë. Sipas nesh, dekreti i emërimit të z. Dado është i pavlefshëm”, tha Ndreca.
Edhe Erion Veliaj kërkoi pranimin e kërkesës. “Është evidente që po krijohet asimetri. Një pale po i shtohet interesi publik, të paditurit po i largohen të tjerët, KLP dhe Avokati i Shtetit. Ose KLP nuk tregon respekt për këtë gjykatë, ose ka kuptuar atë që di gjithë Shqipëria, që Ols Dado nuk është prokuror dhe kryebashkiaku është arrestuar. Mandati i kryetarit të bashkisë nuk mund të trajtohet si plaçkë. Dikush ka veshur uniformën e shtetit dhe më ka rrëmbyer nga zyra. Kjo shoqatë është e legjitimuar, pesha juaj, i nderuar, është për të rikthyer besimin te drejtësia. Nëse dikush mund të vishet si polic apo si prokuror në këtë teatër, merr në qafë një qytet të tërë. Unë dy fitore i kam marrë edhe pa shkuar në Strasburg. Nëse më rrëmbyen mua, mund të rrëmbejnë këdo tjetër. Një noter që është emëruar në kundërshtim me ligjin. Është pesha e këtij gjykimi që të rikthejë besimin te drejtësia. I mungoj shumë familjes sime në ditët më të vështira, i mungoj dhe bashkisë sime që e lashë ndryshe. Kushdo palë që tregon interes, kontribuon në këtë gjykim. Do t’ju kërkoja që të pranohet shoqata”, tha Veliaj.
Avokati i Ols Dados, Erarbër Madhi, kërkoi rrëzimin e kërkesës.
Gjykata theksoi se ka një kërkesë për ndërhyrje kryesore në gjykim edhe nga Tom Deda, ish-prokuror, duke shtuar numrin e kërkesave për ndërhyrës kryesorë në gjykim.
Erion Veliaj kërkon shfuqizimin e dekretit të Presidentit për emërimin e Ols Dados, pasi argumenton se ai nuk plotësonte kushtet për t’u emëruar prokuror.
