Gjykata e Apelit të Posaçëm rrëzoi ankimimin e Ilir Beqajt kundër masës së sigurisë, duke lënë në fuqi masën e “arrestit me burg” për ish-ministrin e Shëndetësisë.
Beqaj kishte kërkuar zëvendësimin e masës së sigurisë nga “arrest me burg” në “arrest shtëpie”, por kërkesa e tij ishte rrëzuar më herët edhe nga Gjykata e Posaçme e Shkallës së Parë (GJKKO). Në përpjekje për lehtësimin e masës, ish-ministri kishte ofruar edhe garanci pasurore, por kjo kërkesë nuk u pranua nga gjykata.
Ashtu si GJKKO, edhe Apeli i Posaçëm vendosi që Beqaj të vijojë të qëndrojë në paraburgim.
Ish-ministri i Shëndetësisë po përballet me akuzat në dosjen e koncesionit të sterilizimit, ndërsa ndaj tij po hetohet edhe një çështje tjetër penale që lidhet me dyshime për abuzime me fondet e Bashkimit Evropian, gjatë kohës kur drejtonte Agjencinë Shtetërore të Programimit Strategjik dhe Koordinimit të Ndihmës (SASPAK).
