Kreu i Grupit Parlamentar të PD-së u përjashtua nga punimet e seancës plenare pasi hodhi ujë në drejtim të kryeministrit Edi Rama, në një moment tensioni mes opozitës dhe mazhorancës.
Seanca plenare e Kuvendit u shoqërua me tensione, pasi kryetari i Grupit Parlamentar të Partisë Demokratike, Gazment Bardhi, u përjashtua nga punimet pas një incidenti me kryeministrin Edi Rama.
Ngjarja ndodhi gjatë kohës kur mazhoranca po vijonte me votimin e projektligjeve të parashikuara në rendin e ditës, ndërsa deputetët e opozitës kishin bllokuar foltoren dhe po kundërshtonin zhvillimin e procesit me zhurmë në sallë, përfshirë goditjen e tavolinave me sende.
Bardhi u ngrit nga vendi i tij dhe hodhi ujë në drejtim të kryeministrit Rama, duke e lagur. Pas incidentit, kryetari i Kuvendit, Niko Peleshi, reagoi duke njoftuar përjashtimin e deputetit demokrat nga seanca.
Pavarësisht vendimit të drejtimit të Kuvendit, Bardhi vijoi të qëndrojë në sallë, ndërsa mazhoranca nuk ndërpreu procesin dhe vazhdoi votimin e projektligjeve njëri pas tjetrit.
Përplasja mes deputetëve të opozitës dhe mazhorancës vijon në një seancë të karakterizuar nga tensione të larta politike dhe përplasje procedurale.
