Disa ditë më parë, VNA raportoi se gara për drejtimin e Komisionit të Prokurimit Publik nuk ishte një procedurë rutinë, por një përplasje mes klaneve më të fuqishme të Partisë Socialiste për kontrollin e një institucioni kyç, nga i cili kalojnë ankesat për tendera me vlera dhjetëra e qindra milionë euro.
Zhvillimet e sotme në Kuvend duket se e konfirmuan këtë skenar.
Teksa jashtë Parlamentit protestuesit përplaseshin me policinë, brenda sallës u zhvillua një betejë krejt tjetër. Jo për integrimin europian, as për hallet e qytetarëve, por për drejtimin e Komisionit të Prokurimit Publik.
Me 78 vota pro, 3 abstenime dhe 4 kundër, Kuvendi zgjodhi Ismail Shehun në krye të KPP-së.
Megjithatë, votimi nuk ishte aspak formal. Përplasja mes grupimeve brenda PS-së u reflektua edhe në ndërprerjen dy herë të seancës parlamentare, ndërsa në fund u desh ndërhyrja e kryeministrit Edi Rama për të zhbllokuar situatën.
Ashtu siç kishte raportuar VNA, Ismail Shehu konsiderohej kandidati i mbështetur nga Ulsi Manja, ndërsa Enea Hoti shihej si kandidati i afërt me Bledi Çuçin. Në fund, Hoti u tërhoq nga gara, ndërsa kandidatura e Behar Zenelit, i identifikuar me linjën e Bashkisë së Tiranës, mori vetëm dy vota pro.
Ironia është se, ndërsa prej muajsh qeveria premton se inteligjenca artificiale do të reduktojë ndërhyrjen njerëzore në prokurimet publike, për drejtimin e institucionit që vendos mbi fatin e tenderave u desh ndërhyrja personale e kryeministrit për të shuar konfliktin mes klaneve të mazhorancës.
Në fund, më shumë sesa algoritmet, rezultatin e vendosën ekuilibrat politikë.
