Deputetja e Partisë Socialiste, Sara Mila, u përplas në studio me aktivistin Ilir Xhemalaj, duke vënë në pikëpyetje pretendimin se protesta është anti-establishment dhe e pavarur nga partitë politike.
Mila argumentoi se protesta bie në kontradiktë kur deklaron se është kundër establishmentit, ndërsa, sipas saj, pret mbështetjen dhe numrat e Partisë Demokratike. Ajo pyeti drejtpërdrejt nëse Sali Berisha dhe PD janë pjesë e protestës apo pjesë e sistemit kundër të cilit protestohet.
Nga ana tjetër, Xhemalaj mohoi që Partia Demokratike të ketë rol në organizimin e protestës, duke theksuar se në grupin organizator nuk ka asnjë eksponent të saj. Ai madje pretendoi se shumica e protestuesve janë ish-votues ose mbështetës të Partisë Socialiste dhe kujtoi se, sipas tij, Partia Demokratike është përpjekur dy herë ta marrë protestën, por është refuzuar.
Debati u tensionua edhe më tej kur Mila ironizoi deklaratat për pjesëmarrjen e qindra mijëra protestuesve, duke pyetur se si mund të identifikoheshin politikisht 300 mijë persona. Xhemalaj iu përgjigj se protestuesit kanë qëlluar me vezë çdo deputet që ka dalë nga Kuvendi, pavarësisht përkatësisë politike, duke këmbëngulur se protesta është kundër të gjithë klasës politike dhe jo në shërbim të Partisë Demokratike.
