Presidenti i Shteteve të Bashkuara, Donald Trump, po shfaq gjithnjë e më shumë skepticizëm ndaj mundësisë që negociatat me Iranin të çojnë në një marrëveshje të qëndrueshme paqeje.
Sipas Wall Street Journal, presidenti amerikan është bindur gjithnjë e më shumë se udhëheqja iraniane i përgjigjet vetëm presionit dhe forcës ushtarake. Burime të cituara nga gazeta bëjnë të ditur se Trump e ka përshkruar veten si në një “modalitet hakmarrjeje” ndaj Teheranit, duke sinjalizuar një qëndrim më të ashpër ndaj regjimit iranian.
Sipas këtyre burimeve, besimi i kreut të Shtëpisë së Bardhë te një zgjidhje diplomatike është dobësuar ndjeshëm gjatë ditëve të fundit. Trump mësohet se u ka shprehur shqetësimin këshilltarëve të tij për vështirësinë në identifikimin e personave që kanë autoritet real për të negociuar në emër të udhëheqjes iraniane.
Presidenti amerikan ka shprehur gjithashtu pakënaqësi për atë që e konsideron një model të përsëritur nga ana e Teheranit: sipas tij, sa herë që Uashingtoni beson se ka shënuar përparim në bisedime, Irani rikthehet me veprime armiqësore dhe tensione të reja, duke dëmtuar përpjekjet diplomatike.
Raportimi i Wall Street Journal publikohet në një moment kur marrëdhëniet mes Shteteve të Bashkuara dhe Iranit ndodhen në një pikë kritike. Ende nuk është e qartë nëse palët do të rikthehen në tryezën e negociatave apo nëse përballja mes tyre do të marrë një drejtim më të ashpër.
