Pentagoni po shqyrton mundësinë e një operacioni tokësor në shkallë të gjerë në Iran, me objektiv kapjen ose shkatërrimin e rezervave të uraniumit të pasuruar, raportojnë New York Post dhe CNN.
Sipas raportimeve, plani po analizohet si një alternativë ndaj sulmeve ajrore kundër objekteve bërthamore iraniane dhe do të kërkonte angazhimin e mijëra trupave amerikane. Në fazën e parë, forcat konvencionale do të siguronin zonat përreth objekteve bërthamore, do të pastronin hyrjet dhe do të krijonin korridore të sigurta, ndërsa më pas njësi speciale, përfshirë Navy SEALs dhe Army Rangers, do të hynin në objektet nëntokësore për të sekuestruar ose shkatërruar uraniumin.
Objektivat e mundshëm përfshijnë komplekset bërthamore në Fordow, Isfahan dhe zonën e Natanzit, ku sipas vlerësimeve të Agjencisë Ndërkombëtare të Energjisë Atomike (IAEA), Irani ka depozituar sasi të mëdha uraniumi të pasuruar.
Ekspertët e sigurisë paralajmërojnë se një operacion i tillë do të ishte jashtëzakonisht i vështirë dhe me rrezik të lartë, për shkak të mbrojtjes së fortifikuar të objekteve dhe mundësisë së një rezistence të armatosur.
Deri më tani, Uashingtoni nuk ka konfirmuar zyrtarisht miratimin e një operacioni tokësor, duke theksuar se bëhet fjalë për një nga disa skenarët që po shqyrtohen nga planifikuesit ushtarakë.
Ndërkohë, autoritetet iraniane kanë pretenduar se sulmet e tyre të fundit kanë shkaktuar humbje të mëdha në radhët e ushtrisë amerikane. Këto pretendime nuk janë verifikuar në mënyrë të pavarur, ndërsa Pentagoni dhe Komanda Qendrore e SHBA-së nuk kanë publikuar të dhëna zyrtare për viktimat.
