Pakistani dhe Katari kanë shtuar përpjekjet diplomatike për t'i dhënë fund konfliktit mes Shteteve të Bashkuara dhe Iranit, duke shkëmbyer mesazhe mes dy palëve pas përgjigjeve të tyre ndaj një formule të përbashkët për uljen e tensioneve.
Sipas burimeve të qeverisë pakistaneze të cituara nga Anadolu, zhvillimi vjen pasi presidenti amerikan Donald Trump urdhëroi pezullimin e përkohshëm të fushatës së bombardimeve ndaj Iranit, pas dy javësh sulmesh të pandërprera.
Islamabadi dhe Doha kanë propozuar që SHBA-ja dhe Irani të rikthehen në pozicionet që mbanin para 9 korrikut, si hap i parë drejt rifillimit të negociatave. Burimet bëjnë të ditur se të dyja palët kanë shprehur gatishmëri për dialog dhe diplomaci, duke rritur shpresat për një zgjidhje politike të konfliktit.
Megjithatë, ndërmjetësuesit paralajmërojnë se situata mbetet e brishtë, ndërsa ekziston rreziku i një përshkallëzimi të ri, veçanërisht në zonën e Ngushticës së Hormuzit.
Sipas propozimit të ndërmjetësuesve, Irani do të rihapte Ngushticën e Hormuzit, ndërsa SHBA-ja do të hiqte bllokadën ndaj porteve iraniane dhe do të lehtësonte sanksionet për eksportet e naftës. Formula parashikon gjithashtu një armëpushim dyjavor dhe rifillimin e menjëhershëm të negociatave, nëse të dyja palët japin miratimin.
