Presidenti i SHBA-së, Donald Trump, ka deklaruar se administrata amerikane ka vendosur të pezullojë përkohësisht sulmet ndaj Iranit për t’i hapur rrugë një zgjidhjeje diplomatike, duke theksuar se Uashingtoni mbetet i gatshëm për dialog me Teheranin.
Në një intervistë për Axios, Trump u shpreh se vendimi synon t’u japë negociatorëve një mundësi për të arritur një marrëveshje, por paralajmëroi se Shtetet e Bashkuara janë të përgatitura të rikthejnë veprimet ushtarake nëse bisedimet dështojnë.
“Po ndalojmë sulmet ndaj Iranit për t’i dhënë një shans diplomacisë. Megjithatë, nëse negociatat dështojnë, jemi gati për veprime të forta ushtarake”, deklaroi presidenti amerikan.
Deklarata e Trump vjen në një moment të tensionuar mes Uashingtonit dhe Teheranit, duke lënë të kuptohet se administrata amerikane po i jep përparësi diplomacisë, por pa hequr dorë nga mundësia e një përgjigjeje ushtarake nëse nuk arrihet një zgjidhje përmes negociatave.
