Avioni që transportonte kryeministrin izraelit, Benjamin Netanyahu, drejt Shteteve të Bashkuara ka përdorur sërish hapësirat ajrore të Greqisë, Italisë dhe Francës, pavarësisht se këto vende janë anëtare të Gjykatës Penale Ndërkombëtare e cila ka lëshuar një urdhërarrest ndaj tij.
Sipas të dhënave të publikuara nga FlightRadar, avioni u nis nga Izraeli në orët e mesditës dhe ndoqi një itinerar të ngjashëm me udhëtimet e mëparshme drejt SHBA-së, duke fluturuar mbi Mesdhe dhe territorin ajror të disa shteteve evropiane, përpara mbërritjes në Washington, ku Netanyahu pritet të zhvillojë një takim me presidentin amerikan, Donald Trump.
Edhe në udhëtimet e zhvilluara më 28 dhjetor dhe 10 shkurt, avioni i kryeministrit izraelit kaloi mbi Greqinë, Italinë dhe Francën. Ndërkohë, gjatë vizitës në Asamblenë e Përgjithshme të OKB-së në New York në shtator 2025, Netanyahu përdori hapësirën ajrore të Greqisë dhe Italisë, por shmangu atë të Francës.
Më 21 nëntor, Gjykata Penale Ndërkombëtare lëshoi urdhërarreste ndaj Benjamin Netanyahut dhe ish-ministrit izraelit të Mbrojtjes, Yoav Gallant, nën dyshimet për krime lufte dhe krime kundër njerëzimit të kryera gjatë konfliktit në Rripin e Gazës.
