Presidenti i Federatës Argjentinase të Futbollit, Claudio Tapia, u ka bërë thirrje tifozëve të pranojnë humbjen në finalen e Kupës së Botës dhe të ndalin polemikat për riluajtjen e ndeshjes, duke theksuar se Spanja e fitoi trofeun me meritë.
Reagimi i tij vjen pasi një peticion i nisur nga tifozët argjentinas ka mbledhur mijëra firma, duke kërkuar riluajtjen e finales dhe duke vënë në pikëpyetje arbitrimin e sllovenit Slavko Vinçiç. Finalja u fitua nga Spanja falë golit të Ferran Torres në kohën shtesë, duke i dhënë "La Roja"-s titullin e dytë kampion bote në histori.
Pas përfundimit të ndeshjes, tensionet u rritën në fushë, ku disa futbollistë dhe anëtarë të stafit të Argjentinës u përfshinë në përplasje verbale dhe fizike me lojtarët spanjollë. Në një nga incidentet më të komentuara, Gavi përfundoi në tokë pas një kontakti, ndërsa FIFA ka nisur një hetim për ngjarjet që pasuan fishkëllimën e fundit. Gjithashtu, një pjesë e futbollistëve argjentinas i kthyen shpinën ceremonisë së ngritjes së trofeut nga Spanja, gjest që u kritikua gjerësisht.
Pavarësisht reagimeve të tifozëve dhe debatit të krijuar pas finales, Tapia u kërkoi mbështetësve të kombëtares të pranojnë rezultatin dhe të vazhdojnë të jenë pranë skuadrës.
"Nuk arritëm ta mposhtnim Spanjën. Ata ishin më të mirë, fituan me meritë dhe ne duhet ta pranojmë këtë. Në sport mëson edhe duke i pranuar humbjet me të njëjtin dinjitet me të cilin feston fitoret," deklaroi kreu i Federatës Argjentinase.
Ai vlerësoi gjithashtu kontributin e kësaj skuadre, duke theksuar se pavarësisht humbjes në finale, ajo vazhdon të mbetet krenaria e vendit.
"Po, humbëm një finale. Por ky grup i ka dhuruar gëzim të jashtëzakonshëm vendit tonë. Humbja dhemb, sepse jemi konkurrues dhe vendi i dytë nuk na mjafton kurrë. Megjithatë, vazhdojmë të jemi një nga dy ekipet më të mira në botë," u shpreh Tapia.
