FIFA ka bërë publike shumën e kompensimit që klubet do të përfitojnë për lojtarët e tyre të grumbulluar me kombëtaret në Kupën e Botës 2026.
Në kuadër të Programit të Përfitimeve për Klubet të FIFA-s, skuadrat do të marrin pagesa për çdo futbollist që ka qenë pjesë e përfaqësueses së tij gjatë periudhës së turneut, nga 1 qershori deri më 19 korrik 2026.
Sipas skemës së miratuar nga FIFA, kompensimi është vendosur në 4 mijë e 300 euro në ditë për çdo lojtar. Shuma do të ndahet në mënyrë proporcionale mes klubeve ku futbollisti ka qenë i regjistruar gjatë dy sezoneve të fundit.
Për Botërorin 2026, organizmi më i lartë i futbollit botëror ka vënë në dispozicion një fond total prej 305.3 milionë eurosh, i cili do t’u shpërndahet klubeve që lejuan lojtarët e tyre të përfaqësonin kombëtaret.
Ky program synon të kompensojë klubet për kontributin e tyre në turnetë ndërkombëtarë, duke shpërblyer skuadrat që furnizojnë kombëtaret me futbollistë gjatë kompeticioneve madhore të FIFA-s.
